Sátnevádjasat

Sátnevádjasiiguin leat fas olbmot čilgen áššiid ja juohkán viisodaga. Dat leat sirdásan buolvvas bulvii ja daiguin lea sáhttán deattuhit áššiid dahje fuomášuhttit olbmuid. Dain leat maid čiegus duohtavuođat ja dat sáhttet leat somát, duođalaččat dahje bilkkut. Sátnevádjasiin lávejit maid áššiid govvet oanehaččat. Sátnevádjasat rávvejit mo olmmoš galgá láhttet, mo ii galgga doaibmat ja dain sáhttá áššiid dadjat veháš nuppeláhkai go dábálaš gielas. Sátnevádjasiid sáhttá geavahit rámpomii ja láitimii, veardádallamii, oahpu ja máhtu addimii. Sátnevádjasa viisodaga ja čiegus duohtavuođa fuomášeapmái dárbbaša veháš jurddašeami maid.

Iešálddes buot álbmogiin leat sátnevádjasat, sápmelaččain maiddái. Seammá sátnevájas sáhttá daddjot iešguđet guovllus veháš earáláhkai. Sáhttá leat maiddái, ahte dain lea veháš eará mearkkašupmige nuppi guovllus go nuppi guovllus. Ovdamearkka dihte sápmelaš láve dadjat jođi lea buoret go oru, muhto suopmelaš fas dadjá iežas ruoktu lea divrras dego golli. Das sáhttá oaidnit maid jurddašeami erohusaid.

Gáldut:
Gaup, Káren Elle: Girjjo-Gárjjo, Muitalusat, máidnasat, sátnevádjasat, árvádusat ja diiddat.
Jođi lea buoret go oru, doaimm. Harald Gaski – Aage Solbakk
Kuokkanen, Rauna: Čáŋa gillii!
Itkonen, T.I: Suomen lappalaiset I

© Sámediggi – Sämitigge – Sääʹmteʹǧǧ